2008-10-31

mga pagbasa kuman, biyernes

Sa balaod nan mga Hudeo, adlaw nan pagpahuway sa mga trabaho matapos an sies dias na pagpahuyas, an sabbath.

Pero, sa ebanghelyo kuman, kon tan-awon nato, tag-kontra ni Hesus an balaod sa sabbath kay may taghimo pa man gihapon Sidja -- an pagtambay sa isa ka may sakit.

Para dako, an nangibabaw dinhi, an gugma nan Ginoo sa tawo kumpara sa pagkamasinundanon sa balaod na hinimo ra nan tawo.

Sanan an pagtambay sa may sakit -- isa ka ekspresyon nan pagmahal, amoy gadjod unahon kaysa sa pagpahuway -- isa ka balaod nan tawo na pagasundon.

Sa ato pa, importante an ekspresyon sanan pagpakita nan paghigugma sa isigkatawo sa tanan panahon.

Lord, itanom sa ako kasingkasing ang tinood na paghigugma sa ako isigkatawo kay amo man ini an imo gusto na ipahimo damo tanan, Amen.

2008-10-30

mga pagbasa kuman, huwebes

Tagpasidan-an si Hesus nan mga pariseo na moiwat na sa ila lugar kay delikado Sidja kan Herodes na arang ka juhot karadjaw Didja kay duro man na mga tawo an mamati sa Idja mga pagtudlo.

Para kan Herodes, kinahanglan na gadjod na mahipos si Hesus kay isa Sidja ka threat para didja.

Pero, adja hinoon magpasidaan si Hesus sa ila na kon dili sila mamati sa Diyos, mas delikado hinoon an ila mga espirituwal na kinabuhi kay mapuo man an ila mga lawas sanan kayag na dili mahilangit.

Amo na kinahanglan gadjod sab kita na mamati sa mga pulong nan Diyos sanan kinahanglan gadjod na ato himoon sab an Idja gusto ipahimo dato para dili mapuo an ato mga lawas sanan kayag.

Diyos ko, hatagi ako nan grasya, Lord, na mohanap pirme nan oportunidad na makapamati nan Imo mga pulong, Amen.

2008-10-29

mga pagbasa kuman, miyerkules

"Kamo isab, mga tatay, adjaw nidjo pagpa-juhuta an idjo mga bata. Tudloi sila nan mga pagtudlo sanan disiplina nan Ginoo."

Dinhi, makita nato sa una na pagbasa na partikular gadjod na tagsultihan nan nagsuyat an mga tatay nan kinahanglan nila himoon para sa ila mga anak.

Buot ipasabot dinhi na seguraduhon gadjod nan tatay na epektibo an idja mga panultihon para sa mga bata parehas kintahay nan jaon pagmando, kinahanglan gadjod na dili kon bagan magdominar o dili kaha jaon adja manumboy kondili an idja pagmando kinahanglan may mga sulti nan may pagrespeto sa katungod nan bata.

Kita isab bilang mga tatay, kinahanglan ato gadjod hauron an Diyos kay Tatay man nato Sidja.

Makadumdum ako sa tatay nako nan bata pa ako na kon ad-oy idja ipamalihog dako na himoon pagkatapos dili nako mahimo, wayay saba lamang sidja na himoon nidja an idja tagpahimo dako.

Kuman na adlaw, gusto nako i-honor an ako tatay, si anhin Jose Bermudez Grana, kay isa sidja ka mapagmahal, buotan, pasensiyoso sanan caring na ama ugsa sulundon sanan ehemplo sidja na tatay sa amo katilingban sa Habungan.

Lord, taghimo man Nimo ako na tatay nan upat ka mga bata na layaki, hatagi ako, Lord, nan kusog sanan hibayo na ako madisiplina sila segun sa gusto Nimo para sa ila, Amen.

2008-10-28

mga pagbasa kuman, martes

Naglibog ako nan una kon uno'y kalainan nan apostol sanan disipulo kay bagan waya ma'y kalainan na duha.

Pagkatapos namo maentra sanan ako asawa, si Thel, sa isa ka Kristiyano na katilingban, hingkat-unan nako, kay adlaw-adlaw na man ako magbasa nan Bibliya, na lain-lain badja an buot ipasabot nan kada pulong nan duha -- an disipulo, tagasunod sa mga pagtudlo ni Kristo pagkatapos, an apostol, taga-hatag nan mensahe sanan embahador ni Kristo.

Wayay isa sa mga apostoles ni Hesus na edukado, propesiyunal, kauwartahan o dili kaha, may posisyon sa sosiyedad pero tag-pili ni Hesus sila na Idja mga mensahero kay dako man an Idja pagsalig na inin mga ordinaryo na mga tawo makahimo nan extra-ordinary na mga buluhaton para sa kaharian nan Diyos sa ilayom nan Idja direksiyon.

Ugsa na kon tawagon kita nan ato Ginoo na mosilbe Didja, dili na seguro kinahanglan pa na eksaminon nato an ato mga kaugalingon kon mahimo nato o kon dili an gusto Nidja na ipahimo dato.

Isumiter lamang nato an ato kaugalingon Didja kay Sidja ra man an mogiya dato pinaagi na Idja Espiritu Santo.

Lord, himua ako na instrumento nan Imo grasya para mahipaabot nako sa ako mga isigkatawo an buot Nimo na ipadangat dila, Amen.

2008-10-27

mga pagbasa kuman, lunes

An inhibay-an nako na tawag sa Habungan nan dili mosimba pagka domingo, erijes.

Nan bata pa ako, tayagsa ra an Misa kada Domingo sa lungsod kay an pari magagikan pa man sa Kitcharao na doro sab an misa nan jaon na adlawa sa mga baryo sa highway.

Pinaka-ulihi na prayoridad an Habungan na misahan pari kay sudlunon man na lugar an Habungan gikan sa higway.

Pero kon Domingo, jaon gihapoy serbisyo sa simbahan bisan wayay pari.

Demudo, Domingo nan buntag, mamanaw na kami iban an ako pamilya patunong sa simbahan kay para mosimba pero, hisugatan sab namo an mga tawo na may bitbit na mga manok patunong sa buyangan.

Natingaya ako nan jadto na mga tungura kay bata pa man ako.

Nareyalisar na nako kuman na may mga tawo badja gadjod na mas unahon nila an linga-lingaw kon Domingo kaysa sa paggahin nan oras para sa Diyos.

Ginoo ko, hatagi ako nan grasya na makapagpasalamat sanan makadajeg Dimo kay Ikaw ra man gadjod an angadjan na ako palasamatan sanan dadjegon adlaw-adlaw, Amen.

2008-10-26

mga pagbasa kuman, domingo

"Higugmaa ang Ginoo na imo Diyos nan tanan jaon dimo sanan higugmaa sab in imo silingan (isigkatawo) parehas nan paghigugma nimo sa imo kaugalingon."

Madali ra isulti na higugmaon ang Diyos kay Ginoo sanan Tatay man nato Sidja pero an paghimo nan paghigugma sa silingan, imposible!

Sa Habungan, wayay problema an paghigugma sa silinangan kay kahamukan didto, an silingan nato, kon dili kon manghod o maguyang o ginikanan, mga lumon ra sab.

Pero kon makasilingan kaw nan dili nimo karadjaw kon kilaya parehas nan mga silingan sa siyudad, malisod seguro himoon an ikaduha na importante na balaod nan Diyos.

Unhon man nimo paghigugma an silingan na masinasinahon, tabian, libakera sanan manyamid?

Seguro, may hataas pa na gusto ipasabot si Hesus dato -- gusto Nidja na magkasinabtanay, may kalinaw sa hunahuna sanan sa mga panultihon an tanan para wayay samok, demudo may kalinaw sab sa katilingban.

Ginoong Hesus, tabangi ako na makamugna nan maradjaw na relasyon sa ako isigkatawo para an kalinaw permi amoy maghari damo, Amen.

2008-10-25

mga pagbasa kuman, sabado

"Ibta na ton tanum na dili mamunga kay nag-usik-usik lamang ton nan bitamina nan lupa na tag-tamnan."

Kon an isa butang waya nay puyos, kinahanglan idespatsa na kay waya namay gamit.

Sa ebanghelyo ni Lucas kuman, kamatadjon an dangatan nan mga tawo na makasasaya kay gusto man nan Diyos na maghinulsol sila sa ila mga saya pero mo-insister paman gadjod na mohimo pa na mga saya.

Sa ato mga kinabuhi, kinahanglan mobalik na kita sa ato Diyos pinaagi sa ato paghinulsol sa ato mga kasay-anan sanan paglimpiyo nan ato mga kasing-kasing kay dakan permi kita may kinabuhi kay kinabuhi man ad-on kan Kristo.

Ipadadjon nato an ato pagka-maradjaw para permi malipay an Ginoo dato sanan mahipreparar nato an ato kinabuhi sa wayay katapusan na kinabuhi iban an ato Diyos sa kalangitan.

Ginoo ko, limpiyuha an ako kinabuhi para andam adlaw-adlaw kay para prepatado ako na moatubang dimo pag-abot nan panahon, Amen.

2008-10-24

mga pagbasa kuman, biyernes

Sa epistola kuman ni Pablo para sa mga taga-Efeso, pagka-isa o paghugpong an idja tema.

Sa Habungan, inday uno man gadjod jaon na dili man magkahi-usa an mga tawo.

Ehemplo: Adton noagi na pista nan Agusto, isa ka duyom an in-gahin para magkita-kita an mga alumnay nan elementarya na taghimo sa isa ka pabayle.

Demudo, kinasiluman, nagsabot na dadjon an mga nag-atender kon unoy ila mahimo sanan mahipa-ambit para sa karadjawan nan eskuwelahan sanan nan lungsod.

Ingkaduyman sanan inkabuntagan rakan nan domebate, waya gadjod magkasinabot kon unoy isa ka partikular na proyekto an himoon kay puro man mga maayonglaki moesplekar nan tagsa-tagsa nila ka huna-huna.

Pero para kan Pablo, an idja pag-awhag dato na magka-isa sa ato pagtoo sa Diyos, kinahanglan seguro na ato pakusgon an ato pagka-isa para sa kahimayaan Nidja sa kahitas-an.

Tag-himo ba nako an panawagan nan Ginoo na mahimo ako na isa tinood na Kristiyano, pasensiyuso, masinabtanon, mapailubon sanan naningkamot na mapreserba an pagkahiusa sa Espiritu?

Lord, tudloi ako nan imo mga pama-agi para permi ako abri sa imo Espiritu, Amen.

2008-10-23

mga pagbasa kuman, huwebes

Uno kaha na klase na kayadjo an taghisgutan ni Hesus sa ebanghelyo nato kuman, pagkatapos, gusto pa gadjod Nidja na naglagablab pa gadjod?

Sa estorya sa Daan na Testamento, kayadjo an simbolo nan presensiya nan Diyos sa mga tawo - kan Moises, sa nagkayadjo na sagbot.

Kayadjo sab gihapon an simbolo nan pagpakita nan Himaya na Diyos.

Bisan sa pagpadaya ni Hesus nan Idja Espiritu Santo sa mga disipulo, mga dila nan kayadjo gihapon an noabot sa mga suluguon.

Para sa ako, an gusto ipasabot ni Hesus nan kayadjo dinhi, na an tanan mga tawo sa tibook kalibutan may pagkilaya sanan may pagkahadlok sa Diyos na Ama sa Langit.

Na an tanan sa kalibutan nagtuo sa Diyos.

Tanan tawo nagbaton nan grasya nan Espiritu Santo.

Diyos ko, bag-oha kami sanan pun-a kami nan grasya pinaagi nan Imo Espiritu Santo kay dakan makahimo kami nan mga gusto mo na ipahimo damo, Amen.

2008-10-22

mga pagbasa kuman, miyerkules

Waya'y nahibayo dato tanan kon kun-o kita husgahan na ato Diyos.

Pero tagpasindan-an daan kita Nidja na kinahanglan permi gadjod kita andam kon uno ma'y mahitabo dato.

Sa pasumbingay ni Hesus sa ebanghelyo nato kuman mahitungod sa kawatan na dili lamang hibay-an kon kun-o mangawat - manayming nan jaon dili kon preparado an tagbayay - klaro an Idja mensahe.

Uno na klaro man, kay tagsumpadjan man kita Nidja paglaong na kinahanglan preparado gadjod kita kay moabot lamang an Anak nan Tawo sa panahon na dili nato paabuton.

An mensahe Nidja na sa kada segundo, minuto, o oras sa ato mga kinabuhi, kinahanglan andam kita na moatubang sa ato Tagamugna kay Sidja man an Tag-idja nan tanan mga butang sanan mga tawo sa kalibutan.

Lord, hatagi ako nan grasya na permi ako preparado sa ako kinabuhi kada segundo, kada minuto sanan kada oras, twenty four-seven, Amen.

2008-10-21

mga pagbasa kuman, martes

Kinahanglan permi gadjod kita andam sa tanan mga mahitabo sa ato kinabuhi.

An ato pagka-matinud-anon sa ato mga pulong sanan sa mga saad nato na motuman sa Idja mga tagpanimo dato, amoy kinahanglan gadjod na ipermis nato sa ato mga kinabuhi.

Kon kintahay pangutan-on kita kuman nan ato Ginoo kon andam na kita na moatubang sa ato kamatadjon despuwes Didja kay Idja na kita husgahan kon mahilangit kita kon dili, andam na kaha kita na moatubang Didja na may kompiyansa kay segurado man kita na an ato kinabuhi dinhi sa kalibutan, ato man gadjod taggamit para sa serbisyo nato Didja.

Lord, hatagi kami nan grasya nan pagka may malipadjon na paglaum para permi kami andam sa amo panerbisyo sa isigka-tawo namo, Amen.

2008-10-20

mga pagbasa kuman, lunes

Mahamok na an mga maglumon na nagkadeperensiya na an hinungdan, erensiya.

Mas halayum karadjaw an away nan mga maglumon sanan usahay, kinamatadjan karan nila an ila mga deperensiya na dili sila magka-uli.

Uno man kaha na tangutana man ni Hesus an tawo kon sin-oy nagtugyan Didja na huwes sanan taga-husay?

An tan-aw nako, taghimo lamang Nidja na introduksiyon ini para mahi-paabot Nidja an punto na gusto Nidja ihatag mahitungod sa pagka-hakog nan isa ka tawo.

Kon puro kaugalingon lamang nan isa sa tawo an idja permi huna-hunaon pero wayay idja pagpakabana sa iban na mga tawo, wayay nada gadjod ini para sa Diyos sanan sa tawo.

Wayay isa ka tawo na mabuhi na sidja-sidja ra.

Ginoo kong Hesus, wayaa an ako pagka-masinahon sa mga butang na dili kon ako despuwes tabangi sab ako na magamit nako an mga butang na Imo taghatag dako para sa Imo himaya, Amen.

2008-10-19

mga pagbasa kuman, domingo


Tag-selebrar nato kuman adlawa an World Mission Sunday.

An selebrasyon nato nan ini na pista, dili buot ipasabot na kinanglan gadjod kita manlangyaw pa para mahipa-ambit nato an ebanghelyo nan ato Ginoo sa iban na mga tawo.

Sa ato tagsa-tagsa ka sitwasyon, nakahimo ba kita nan pagsangyaw sanan pagpaambit nan mga pulong nan Diyos pinaagi sa ato pagka-saksi o pagka-testigos Nidja nan Idja gusto ipaabot sa mga tawo, bisan sa ato ra lamang anay mga gintudjok, mga lumon, mga silingan sanan mga isigkatawo?

Jaon taglaong na "great commission", sa tan-aw nako, amo ini an pinaka-hataas na sugo nan Diyos para sa ato tanan -- na ato isangyaw an Idja mga pulong sanan mga sugo sa tanan tawo sa kalibutan na kinahanglan gadjod himoon para kita tanan makalakbit nan Idja Himaya sa kinabuhi na wayay katapusan.

Ginoo ko, hatagi ako nan grasya sanan kusog na mahimo nako an pagsangyaw nan Imo mga pulong sanan Imo mga sugo para damo na Imo mga pinayangga na mga anak, Amen.

2008-10-18

mga pagbasa kuman, sabado

May pangutana para sa dato kuman na adlaw: "Andam ba kita na mosilbe para mahimo na taga-harvest nan ato Ginoo?"

Tagsugo ni Hesus an Idja mga tagapagsunod na mangaliya na hamukon nan Diyos an mga pahinante para sa harvest (inday kon unoy hinbunganon nan ini?).

Demudo, kinahanglan gadjod na aksiyunan nato an Idja imbitasyon kay duro pa man an nanginahanglan nan Idja mga pagtulun-an, kamatuoran sanan lamdag.

Sa ato adlaw-adlaw na kinabuhi, maradjaw seguro kon ato rakan ihalad an ato mga aktibidades sa Diyos para sab nato mahibalik sa Didja an mga grasya na Idja taghatag sa ato tanan.

An buot nako ipasabot na mosunod lamang kita sa mga kinahanglan ipahimo dato nan Diyos -- an pagsangyaw nan Idja mga pulong kay kita man an Idja taghimo na mga testogos dinhi sa kalibutan.

Ginoo kong Hesukristo, himoa ako na instrumento nan imo kamatuoran sanan nan imo lamdag bisan hain ako mahidangat, Amen.

2008-10-17

mga pagbasa kuman, biyernes

Dili nato mabilang an buhok sa ato mga uyo pero kada hibla nan ato buhok inhibay-an nan Diyos.

An mga madja na maglupad-lupad sa ibabaw sa plaza nan Habungan kon magtili-tili, inatiman nan Diyos permi kay mahal man Nidja an tanan mga langgam.

Pero inday uno man na sa ebanghelyo kuman, an tag-hisgutan nan ato Ginoong Hesus an lebadura man, jaon pampa-alsa kon magluto nan puto.

Sa ako tan-aw, an baking powder o lebadura, kon mahimiksla na sa harena, kinahanglan lutuon na gadjod dadjon kay kon madugay an miniksla, madaot man ton, pagkatapos dili na magamit sa sunod na pagluto nan puto.

Sa ato pa, an lubadura na taghisgutan dinhi ni Hesus, an mga daot na lebadura, mabaho sanan makahilo na.

Per eso, gusto ni Hesus na dili kita mosundog sa mga ginbuhatan nan mga periseo, maradjaw lamang sila momando pero dila sila mohimo.

Diyos Ama, nahibayo ako na mahal ako Nimo karadjaw kay bisan an mga madja, Imo man tag-atiman bisan hain sila molupad. Hinaot unta na kasuklian sab nako an Imo pagmahal dako pinaagi sa ako pagsunod nan mga gusto Mo ipahimo dako, Amen.

2008-10-16

mga pagabasa kuman, huwebes

Tayagsa ra an mga pari na makadto sa Habungan para magmisa nan an una pa na mga panahon, nan mga gagmay pa kami.

Usahay, semana santa ra gani makabisita an pari sa isa ka tuig, gikan sa Kitcharao (didto an kombento nan mga pari sa parokya) kay malisod pa man magsuyod sa lungsod - mag-pump boat pa gikan sa San Roque.

May isa ka holy week na arang kaisog an pari na-aasign sa Habungan.

Kon unoy idja instruksiyon, amoy himoon nan mga tawo kay majuhot man sidja kon dili tumanon.

Ugsa jadto na tuiga na selebrasyon nan semana santa, gamay ra karadjaw an nag-participate sa mga church acrtivities kay hadlok man an mga tawo sa pari.

Uno man na tag-estorya man nako ini?

An punto ko dinhi -- dili kon mga regulasyon an basehan nan ato tinuohan sa Diyos kon dili an ato kasing-kasing na tinood nato ihorar sa ato Ginoo.

Salamat, Ginoo ko, sa pagpasabot mo dako na an tinood na pagtuo naka-base dili lamang kon sa mga regulasyon sanan mga atibidades nan relehiyon kon dili sa Imo grasya ra gadjod, Amen.

2008-10-15

mga pagbasa kuman, miyerkules

Sa suyat sa mga Galasya, tagpakita sa ato ni San Pablo an kinahanglan nato likadjan o talikdan na mga binuhatan - imoralidad, kabastusan, pagka palahubog, matuo-tuohon sa mga diyu-diyusan sanan mahamok pa - mga hinungdan na dili an tawo mahilangit, jaon taglaong na dili maka-eridar nan Gingharian nan Diyos.

Tagpasidan-an kita nidja na ini an mga bunga nan lawasnon na unod, amoy magtukmod dato nadto sa impiyerno.

Pero, an Espiritu na ato giya sa kinabuhi amoy maghatag dato nan gugma, kalipay, kalinaw, pasensiya, pagkamanginhatagon sanan mahamok pa na mga bunga nan Espiritu.

Dinhi nato makita na mahal gadjod kita karadjaw nan ato Diyos kay tagpadaya man Nidja an Idja Espiritu Santo pinaagi kan Hesus.

Mahal namo na Ginoo, mahanap unta namo an mga bunga nan Imo Espiritu kaysa sa mga balaod nan lupa, Amen.

2008-10-14

mga pagbasa kuman na adlaw, martes

Sa ato pag-atender sa mga piging, maignay kita sa nag-imbetar dato kay bisita ra man kita.

Pero kan Kristo, Idja hinoon tagkasab-an an mga tawo matapos Sidja mapuna na waya manhugas nan Idja alima antes mokaon - isa ka ritwal nan mga Hudeyo.

An buot ipaabot Nidja sa mga tawo, dili kon pisikal gadjod na pag-limpiyo kon dili, paglimpiyo nan ila mga espiritwal na kinabuhi sanan pag-andam nan ila mga kasing-kasing, uno may mahitabo sa kalibutan.

Sa ato mga adlaw-adlaw na kinabuhi, ato ba inabe-abi si Hesus, in imbitar ba nato Sidja na mahimo na importante na parte nan ato kinabuhi?

Ginoo ko, pun-a ako nan imo gugma, palambua an ako espirutwal na kinabuhi, limpiyuha an ako kasing-kasing sa mga mayaot na huna-huna sanan tabangi ako na madajaw unta an ako relasyon sa ako isig ka tawo, Amen.

2008-10-13

Readings: Text

Kon tinuod pa an mga tagna na ato hindunggan nan una, inday dugay ra kita tanan nangamatay kay arang na man kaduro an mga tagtagna na maguba na kuno an kalibutan.

Sa Habungan, duro an mga matuotuohon.

Magsul-ob kuno nan habak sa hawak na tagrekomendar nan isa ka tambajon para panalipdan kuno sa mga maligno.

Sa tan-aw nako, an gusto ipasabot ni Hesus sa ato ebanghelyo kuman, na kinahanglan hugot lamang gadjod an ato pagtuo Dija sanan himuon lamamng nato ang kagustuhan nan Diyos para sa ato mga kinabuhi.

Lord, himoa ako na isa ka hugot na tagapag-sunod nan Imo mga balaod, Amen.

2008-10-12

Readings: Text

Kon imbitahon kita nan kinasing-kasing sa isa ka kumbera, wayay duha-duha, madali ra kita mo-oo kay nahibayo man kita na sinsero an imbitasyon.

Pero sa estorya kuman sa ato ebanghelyo, lahi an gusto ibaabot ni Hesus dinhi -- imbitasyon nan pag-bag-o sa ato kinabuhi gikan sa pagkamakasasaya nanto sa pagkabuotan.

Para dako, kinahanglan gadjod na ato pamatian sanan himuon an tanan gusto ipahimo dato nan ato Ginoo kay Sidja man an magbuot nan tanan sa kalibutan.

Lord, pun-a an ako kasing-kasing nan gugma, pasasalamat sanan kamangginhatagon sanan himoa ako na isa ka matinund-anon na suluguon mo, Amen.

2008-10-11

Readings: Text

Nan an bata pa ako, usahay makadawat sab ako nan pagdadjeg gikan sa mga titser na maradjaw kuno ako sa klase namo.

Pag-pangutana kon sin-o'y ako nanay, molaong dadjon na "ugsa 'ton bright kay bright man sab si Ma'am Mary (an nanay nako)."

Pero para kan Kristo, an punto Nidja dinhi na kinahanglan gadjod na permi kita mamati sa mga pulong nan Diyos despues, himoon gadjod nato an ato hinmatukan sa ato hindunggan na mga pulong Nidja.

Ginoo ko, dili mahiluna an ako kasing-kasing kon dili gadjod ako makadangop dimo kay ikaw ra man an tinood na dangpanan nan tanan, Amen.

2008-10-10

mga pagbasa kuman, biyernes

Kon minus-minus ra an kusog nan isa ka tawo, pildihon gadjud sidja nan mas makusog pa didja.

Dinhi, gamhanan gadjud si Hesus kay nakita man nato an Idja pagbugaw nan demonyo sa nosapi sa tawo.

Pero, tagpasidan-an kita Nidja na kinahanglan kon nabugaw o nawaya na an mayaot na espiritu sa lawas, pun-on nato an ato kinabuhi nan Idja Espiritu Santo para waya nay luna an mga mayaot na huna-huna.

An buot ipasabot dinhi na kon nagbag-o na kita gikan sa ato mga mayaot na pamayhon, tungdan sanan ipadadjon hangtod sa kahangturan na nato an ato pagka-buotan sa ilayom nan grasya nan Diyos.

Himayaon ta 'Kaw, Lord nan tanan nako pagkatawo kay kinahanglkan man gadjod nako na ideklarar an Imo mga maradjaw na mga taghimo, Amen.

2008-10-09

mga pagbasa kuman, huwebes

Tagpasaligan kita ni Hesus na ipadaya Nidja an Motabang dato, an Espiritu Santo.

Pirme andam an ato Ginoo na ihatag dato an ato mga kinahanglan ugsa na inpadaya Nidja an Idja Espiritu par sab kita maka-ambit nan Indja kinabuhi sanan kalipay.

Ugsa na mangutana kita sa ato kaugalingon kon may kompiyansa ba kita na Idja ihatag dato an kalooy sanan grasya Nidja.

Ama namo na langitnon, puno kaw nan kalooy, grasya sanan karadjawan.

Hinaot unta na dili ako magduha-duha sa pagmahal Nimo dako ugsa dili sab ako managana na hanapon ta Kaw para madawat nako an Imo mga regalo, grasya sanan adlaw-adlaw na mga probisyon para ako mabuhi na anak Nimo sanan disipulo ni Kristo.

2008-10-08

mga pagsbasa kuman, miyerkules

Para sa ako, an pagmugna nan mapagmahal na relasyon an pinaka-importante na elemento nan pangaliya, importe na parte sa pangadje.

Dili mahimo na makapangadje o makig-estorya kita sa ato Diyos kon wayay ato pagmahal Didja kay sa ato pakig-komunikasyon sa ato Ginoo, an relasyon nan paghinigugmaay namugna man.

Amo na kinahanglan sa ato pakig-estorya Didja, an ato isulti o an ato ipaabot an mga simple lamang na mga panultihon para magka-sinabot kita sanan an Diyos na ato ka-estorya.

Pero, sa tinood lamang, bisan dili na nato isulti Didja an ato mga kinahanglan, nahibayo na Sidja nan tanan kay gamhanan man Sidja.

An importante dinhi, an ato relasyon Didja - na ato gadjod ampingan na dili madaot o dili maguba kay dakan permi kita maradjaw sa Idja panan-aw.

Buot ipasabot na peramanente gadjod kita na maligdong sanan maradjaw sa panan-aw nan ato Ginoo para madawat nato an Idja grasya.

Lord, dawata an ako mga pangaliya Dimo sa adlaw-adlaw kay amo ra may ako mahigadjang (mahi-offer) dimo kay Ikaw ra man gadjod an angadjan na modawat nan mga pagdadjed namo, Amen.

2008-10-07

mga pagbasa kuman, martes (Our Lady of Rosary)

Estorya nan duha ka magsuon na babaje, si Marta sanan si Maria (dili kon an Mahal Na Berhin), mga igsoon ni Lazaro na amigo ni Hesus.

Kon tan-awon nato, dili kon parehas an ila estelo sanan pamaagi nan ila mga serbisyo.

Lain-lain sab an ila pamaagi nan pagkuha nan atensiyon nan ila bisita.

Tagpasagdan lamang ni Hesus si Maria na namati sa mga pulong nan Diyos, pero taghimo sab ni Marta an idja bahin na mag-areglar nan mga kinahanglanon nan bisita.

Dinhi, tagpakita lamang an mga pamaagi nan pagserbisyo nan tawo sa Diyos.

Ugsa na lain an lay minister, lain an choir, lain an altar boys, lain an lector sanan commentator sa ato mga Simbahan.

May idja-idja na papel an kada miyembro nan Simbahan para sa Himaya Nan Diyos.

Mahal na Ginoo, hatagan unta Nimo ako nan luna na makaserbisyo sa Imo Kahimayaan, Amen.

HOW TO SAY THE ROSARY

P R A Y E R S

SIGN OF THE CROSS

In the name of the Father and of the Son and of the Holy Spirit. Amen.

THE CREED

I believe in God, the Father Almighty, Creator of heaven and earth. I believe in Jesus Christ, His only Son, our Lord. He was conceived by the power of the Holy Spirit and born of the Virgin Mary. He suffered under Pontius Pilate, was crucified, died, and was buried. He descended to the dead. On the third day He rose again. He ascended into heaven, and is seated at the right hand of the Father. He will come to judge the living and the dead. I believe in the Holy Spirit, the Holy Catholic Church, the Communion of Saints, the forgiveness of sins, the resurrection of the body, and the life everlasting Amen.

THE LORD'S PRAYER

Our Father in heaven, holy be your Name, your kingdom come, your will be done, on earth as in heaven. Give us today our daily bread and for give those who sin against us. Do not bring us to the test but deliver us from evil. Amen.

THE HAIL MARY

Hail Mary, full of grace! The Lord is with you, blessed are you among women and blessed is the fruit of your womb, Jesus. Holy Mary, Mother of God, pray for us sinners, now and at the hour of our death. Amen.

HAIL, HOLY QUEEN

Hail, holy Queen, Mother of Mercy; our life, our sweetness, and our hope! to you do we cry poor banished children of Eve, to you do we send up our sighs, mourning and weeping in this valley of tears. Turn then, O most gracious Advocate, your eyes of mercy toward us, and after this our exile, show unto us the fruit of your womb, Jesus! O clement, O loving, O sweet Virgin Mary! Pray for us O holy Mother of God, that we be made worthy of the promises of Christ.

ACT OF CONTRITION

O my God, I am heartily sorry for having offended You, and I detest all my sins, because I dread the loss of heaven and the pains of hell, but most of all because they offend You, my God, Who are all good and deserving of all my love. I firmly resolve, with the help of Your grace, to confess my sins, to do penance, and to amend my life. Amen.

* * *

O my Jesus, forgive us our sins, save us from the fires of hell and bring all souls into heaven, especially those who need most of your mercy.


THE MYSTERIES OF THE HOLY ROSARY

THE JOYFUL MYSTERIES
(Mondays and Saturdays)

1. The Anunciation of the Archangel Gabriel to the

Blessed Virgin Mary
2. The Visitation of the Blessed Virgin to

Saint Elizabeth.
3. The birth of Jesus at Bethlehem.
4. The Presentation of Jesus in the Temple.
5. The Finding of the Child Jesus in the Temple.

THE SORROWFUL MYSTERIES
(Tuesdays and Fridays)

1. The Agony in the Garden of Gethsemane.
2. The Scourging of Jesus at the Pillar.
3. The Crowning of Jesus with Thorn.
4. The Carrying of the Cross by Jesus to Mt. Calvary.
5. The Crucifixion of Jesus on Mt. Calvary.

THE GLORIOUS MYSTERIES
(Wednesdays and Sundays)

1. The Resurrection of Jesus.
2. The Ascension of Jesus.
3. The Descent of the Holy Spirit upon the Apostles.
4. The Assumption of the Blessed Virgin Mary into Heaven.
5. The Crowning of the Blessed Virgin Mary in Heaven.

THE MYSTERIES OF LIGHT
(Thursdays)

1. The Baptism of Jesus.
2. The First Miracle at Cana.
3. The Proclamation of the Kingdom of God.
4. The Transfiguration.
5. The Institution of the Eucharist.


LITANY OF THE BLESSED VIRGIN MARY

Lord, have mercy on us.
Christ, have mercy on us.
Lord, have mercy on us.
Christ, hear us.
Christ, graciously hear us.
God, the Father of heaven, *
God, the Son, Redeemer of the world,
God, the Holy Spirit,
Holy Trinity, One God,
Holy Mary, **
Holy Mother of God,
Holy Virgin of virgins,
Mother of Christ,
Mother of Divine Grace,
Mother most pure,
Mother most chaste,
Mother inviolate,
Mother undefiled,
Mother most amiable,
Mother most admirable,
Mother of Good Counsel,
Mother of our Creator,
Mother of our Savior,
Virgin most prudent,
Virgin most venerable,
Virgin most renowned,
Virgin most powerful,
Virgin most merciful,
Virgin most faithful,
Mirror of justice,
Seat of Wisdom,
Cause of our joy,
Spiritual vessel,
Vessel of Honor,
Singular vessel of devotion,
Mystical rose,
Tower of David,
Tower of Ivory,
House of gold,
Ark of the covenant,
Gate of Heaven,
Morning star,
Health of the sick,
Refuge of sinners,
Comforter of the afflicted,
Help of Christians,
Queen of Angels,
Queen of Patriarchs,
Queen of Prophets,
Queen of Apostles,
Queen of Martyrs,
Queen of Confessors,
Queen of Virgins,
Queen of all Saints,
Queen conceived with out original sin,
Queen assumed into heaven,
Queen of the Most Holy Rosary,
Queen of peace,

_______________

* Have mercy on us.

** Pray for us.


Lamb of God, who take away the sins of the world,

spare us, O Lord.
Lamb of God, who take away the sins of the world,

graciously hear us, O Lord.
Lamb of God, who take away the sins of the world,

have mercy on us.

LET US PRAY

O God, Whose only-begotten Son by His life, death and resurrection, have puchased for us the rewards of eternal salvation, grant, we pray, that meditating upon these mysteries in the most holy Rosary of the blessed Virgin Mary, we may imitate what they contain and obtain what they promise. Through the same Christ, our Lord. Amen.

2008-10-06

mga pagbasa kuman, lunes

Sa estorya kuman sa ato ebanghelyo, an Samaritano ra gadjod an may kusa na motabang sa biktima nan kawatan kompara sa pari sanan magbubuwis.

Idja anay tagtambajan nan hapyas sanan bino an tawo adeser ipasakay sa idja hadjop despuwes indaya nidja sa huy-anan para patambadjan.

Inpili nidja na himuon an angadjan na himuon nan isa ka tawo para sa isig ka tawo.

Nagdesider sidja na mahimo na isa ka tinuod na silingan.

Sa ato kinabuhi, may mga oportunidad sab kita na mahimo na Good Samaritan pero, usahay pilion man nato na dili rakan kita motabang kay may mga rason kita.

Amo na mangaliya kita sa ato Diyos na hatagan Nidja kita nan kusog sanan disposisyon na makatabang na wayay pagpili nan sirkumstansiya.

Ginoo ko, tabangi ako na ma-overcome nako an ako pamroblema kon ad-oy oportunidad na makatabang ako sa isig ka tawo nako.

2008-10-05

mga pagabsa kuman, Domingo

Kuman na panahona: kagul-anan, tensiyon, kakuyba sa wayay kaseguruhan na kaugmaon sanan mga depresyon, ini an ato pagahidunggan na reklamo nan tawo.

Pero taghatagan man kita nan gahum ato Ginoo na wayaon an tanan mga negatibo na aspeto pinaagi sa pasilidad nan paghunahuna.

Ini tanan di gihapon mag selbi kon dili nato itugyan o ipresentar sa Diyos an ato mga kinahanglan pinaagi sa ato hugot na pangaliya nan ato mga petisyon Didja, sanan kinanhanglan sab na lakipan nato nan kinasingkasing nato na pagpasalamat.

Dawaton nato, willingly, an mga mando nan ato Ginoo sanan an kalinaw na Idja ihatag sa ato mga tagsatagsa ka kinabuhi.

Diyos nan kalinaw, himoa an tanan mga aspeto nan ako kinabuhi na balaanon.

2008-10-04

Kapistahan kuman ni St. Francis of Assisi

mga pagbasa kuman, sabado

"It is good for me that I have been afflicted, that I may learn Your statute." - Psalm 119:71

An pagbasa kuman na kinuha sa libro ni Job, nagpasabot lamang na importante gadjod karadjaw an mga balaod na Diyos, dili lamang kon hibay-an ra kun dili, tumanon gadjod.

Pagkatapos ni Job mag-eksperiyensiya nan mga kalisod matapos nidja tilawi an katam-is nan kinabuhi kay didto man didja tanan mga kahilayan, kabtangan sanan maradjaw na panginabuhi, idja na reyalisar na ang Ginoo ra gadjod gihapon an magbuot nan tanan.

Ugsa na tagsaad nidja sa Diyos na idja igadjang an idja kinabuhi, lakip an idja pamilya na may maradjaw na kahimtang, para mosunod sa mga kagustuhan nan Ginoo.

Amo na kinahanglan sab nato hibay-an na abir kon anoy mahitabo sa ato kinabuhi, permanente gadjod karadjaw na jaon kita sa mga payad nan Diyos.

Ipangaliya nato sa ato Ginoo na hatagan Nidja kita nan kamapahiubsanon para i-ackonowlege na Sidja permi amoy magbuot sa ato kinabuhi sanan hatagan sab Nidja kita nan kusog na mabuhi sa Idja poder.

2008-10-03

pagbasa kuman

Kon kintahay mobisita sa ato lugar kuman si Hesus, uno kahay idja sultihon dato?

Pasidan-an kaha kita nidja parehas nan idja taghimo sa mga tawo sa lugar na idja tagkadtuan sa ebanghelyo?

Kada kadtuan ni Hesus, magmelagro sidja kay gusto Nija ipa-abot sa mga tawo na mahal sila nan Diyos.

Pero, uno man kaha na juhot man Sidja sanan bagan an tuno nan Idja sulti, nalu-oy man sab Sidja?

Kay gusto man Nidja na maghinulsol na sila sa ila mga saya sanan sa mga taghimo nila na kontra sa gusto nan Diyos.

Amo na kinahanglan magbag-o na kita samtang sadjo pa!

2008-10-02

mga pagbasa kuman na adlaw

Mahal gadjud kita karadjaw nan ato Ginoo kay kada isa dato, may naka-assign man na angel de la guardia, anghel na magprotekta, maggiya sanan magbantay sa ato mga kinabuhi.

Nagtuo sab kita na an waya pay buot na mga bata, mga anghel pa sila kay kon mapatay an isa ka bata, molaong man dadjon kita na deretso iton sa langit kay anghel pa sidja.

Gusto nan ato Diyos na ad-oy ato paghuna-huna na parehas nan mga bata kon gusto nato na mahilangit kita.

Pero, magabuot-buot man kita paghimo nan mga butang segun sa to kagustuhan, na dili nato ikunsolta Didja antis kita moaksiyon.

An buot ipasabot nan ini na kinahanglan huna-hunaon gadjod nato na dili kon kita an in-charge nan ato mga kinabuhi kay una, may anghel man na permi magbantay dato, sanan ikaduha, na tinan-awan kita permi na ato Ginoo sa ato mga kunabuhi.

2008-10-01

mga pagbasa kuman, mauyan na adlaw

Kon palandungan nato an imbitasyon ni Hesukristo na mosunod didja, bagan imposible karadjaw kay hamimis kaw na dili na man kita makauli sa bayay nato para makapanamilit sa ato mga mahal sa kinabuhi.

Sa tagsatagsa nato na kinabuhi, jaoy ato kagustuhan na mosunod kan Kristo para makaserbisyo kita para sa Kahimayaan nan Gingharian nan Diyos.

Pero, mahamok pa man lagi an ato ikonsidera antis kita makasunod Didja - an mga bayay, mga kabtangan, sanan an mga obligasyon pa sa kalibutan.

Masbale dili rakan nato paghunahunaon an ato mga kagul-anan.

Ugsa na ipresentar rakan deretso nato an ato kaugalingon Didja para sa Idja disposisyon kay Sidja ra man an magbuot para sa ato mga kinabuhi.